ជួយ និង បោកប្រាស់​ មាន​មុខមាត់​ដូច​ម្ដេច?

ហេតុ​អ្វី​ត្រូវ​ពន្យល់​ប្រៀបធៀប​​ពាក្យ​ទាំង​ពីរ​នេះ បើ​វា​​ខុស​គ្នា​ស្រលះ​បែប​នេះ​? បាន​ជា​ពាក្យ​នេះ​ធ្វើ​​ឱ្យ​ខ្ញុំ​ចាប់​អារម្មណ៍ ព្រោះ​តែ​ សកម្ម​ភាព​ដែល​បង្កើត​​ជា​ពាក្យ​ទាំង​ពីរ​នេះ​​អាច​ប្រែ​ប្រួល​ទៅ​វិញ​ទៅ​មក​បើ​សិន​សកម្ម​ភាព​នោះ​ធ្វើ​ឡើង​ក្នុង​ចេតនា​ផ្សេង​គ្នា​។ ​សកម្ម​ភាព​ក្នុង​ចេតនា​ផ្សេងគ្នា បាន​ន័យ​យ៉ាង​ដូចម្ដេច?

នៅ​ពេល​អ្នក​ពន្យល់​នរណា​ម្នាក់​ឱ្យ​​យល់​ពី​ហេតុ​​ដើម្បី​ទៅ​ដល់​គោល​ដៅ​មួយ​ដែល​អ្នក​ចង់​ឱ្យ​គេ​ទៅដល់ យល់ ឬក៏​ជឿ អ្នក​បាន​ប្រើ​ប្រាស់​​គ្រប់​​មធ្យោបាយ​ យុទ្ធសាស្ត្រ ភាព​ឆ្លាត​វៃ ភាព​បត់​បែន បទ​ពិសោធន៍ ភស្តុតាង​​និង ពេល​ខ្លះ​អ្នក​និយាយ​បង្វែរ​ដាន កុហក បញ្ចុះបញ្ចូល ឬ​រហូត​ដល់​ថ្នាក់​កំផិត​បំភ័យ​ក៏​មាន។ តើ​វា​ជា​ការ​បោក​ប្រាស់​គេ​ឬទេ​​? វា​ជា​ការ​បោក​ប្រាស់​សុទ្ធសាធ​ បើ​សិន​គោល​​ដៅ​ដែល​​​ចង់​បាន​នោះ​ផ្ដល់​ផល​ប្រយោជន៍​សម្រាប់​តែ​ខ្លួនឯង ហើយ​​បំផ្លិច​បំផ្លាញ​ដល់​ផល​ប្រយោជន៍​រួម ​ផល​ប្រយោជន៍​សាធារណៈ​ ផល​ប្រយោជន៍​នរណា​ម្នាក់ ឬ ផល​ប្រយោជន៍​មនុស្ស​ដែល​អ្នក​និយាយ​ទៅ​កាន់​នោះ​តែ​ម្ដង​។ ផ្ទុយ​ទៅ​បើ​ការ​ធ្វើ​បែប​នេះ អាច​ផ្ដល់​​​ប្រយោជន៍​ដល់​អ្នក​ស្ដាប់​ ឬ​ផល​ប្រយោជន៍​​​រួម​ដល់​ជាតិ​មាតុភូមិ នោះ​វា​លែង​ជា​ការ​បោក​ប្រាស់​ទៀត​ហើយ វា​ជា​ការ​ជួយ​ទៅ​វិញ។ នេះ​ហើយ​ជា​ចេតនា។

នៅ​ក្នុង​ឆាក​នយោបាយ​ដូចគ្នា អ្នក​ប្រហែល​ធ្លាប់​លឺ​គេ​និយាយ​ថា “នយោបាយ​ជា​សិល្បៈ​ធ្វើ​ឱ្យ​បាន​ជោគជ័យ ឬ​ធ្វើ​ឱ្យ​ដល់​គោលដៅ” ។ អ្នកណា​ក៏​អាច​និយាយ​ និង​ធ្វើ​បាន​ដែរ តែ​ត្រូវ​មើល​​លើ​ចេតនា​របស់​អ្នក​ធ្វើ​នោះ។ តើ​គេ​ធ្វើ​ដើម្បី​​អ្វី និង​ដើម្បី​អ្នក​ណា​? មនុស្ស​មួយ​ចំនួន​​យក​លេស​បិទបាំង​​ភាព​ធ្វេស​ប្រហែស និង​កំហុស​​របស់​ខ្លួន​ពី​អ្នក​​នៅ​ជុំ​វិញ​ខ្លួន​ដោយ​បង្វែរ​ដាន និង​កុហក ដើម្បី​​ទប់​កុំ​ឱ្យ​ស្ថានការណ៍​មាន​ភាព​វឹក​វរ ឬ ជ្រួល​ច្របល់​។ ការ​បង្វែរ​ដាន និង​កុហក​នេះ​មិន​មែន​ជា​ការ​បោក​ប្រាស់​ទេ​ បើ​សិន​ជា​គេ​ធ្វើ​ដើម្បី​ប្រយោជន៍​អ្នក​ដទៃ ឬ​ប្រយោជន៍​របស់​សង្គម​ជាតិ។ តែ​ជា​រឿង​ថោក​ទាប​បំផុត​​ បើ​សិន​​ជា​គេ​ធ្វើ​​ដើម្បី​ប្រយោជន៍​​​​​​​សម្រាប់​ខ្លួន​ឯង​ឬ​សម្រាប់​​ក្រុម​របស់​គេ។

កុហក​ដើម្បី​គ្រប់គ្រង​ស្ថាន​ការណ៍ ដើម្បី​ជា​ប្រយោជន៍​ទាំង​អស់​គ្នា​ គឺ​ជា​រឿង​ល្អ។ ដូច​ពាក្យ​ចាស់​ពោល​ថា​ ផ្លូវ​វៀច​កុំ​បង់ ផ្លូវ​ត្រង់​កុំ​ចោល។ តាម​គំនិត​ខ្ញុំ ផ្លូវ​វៀច​ដែល​គាត់​ចង់​មាន​ន័យ មិន​សំដៅ​ដល់​ការ​ កុហក​បោក​ប្រាស់​នោះ​ទេ តែ​ពេល​ខ្លះ​ការ​ពិត​​មិន​អាច​លាត​ត្រដាង​ទាន់ហន់​ពេក​​នោះ​ទេ​ក្នុង​កាលៈទេសៈ​ខ្លះ វា​អាច​ធ្វើ​ឱ្យ​ស្ថានការណ៍​កាន់​តែ​ដុន​ដាប។ ហេតុនេះ​គេ​ត្រូវ​ប្រើ​ការ​កុហក​​ខ្លះ​ តែ​ក្នុង​ចេតនា​ល្អ​ដើម្បី​​ជួយ​អ្នក​​ដទៃ មិន​មែន​ដើម្បី​ទាញ​ផល​ប្រយោជន៍​សម្រាប់​ខ្លួន​ឯង​​នោះ​ទេ។
Featured Image Designed by Dooder / Freepik

Leave a Reply

Your email address will not be published. Required fields are marked *